多得《蘋果》fb「推」介，「搵笨做Intern」成功引起各方尤其是年輕人粗口橫飛的「關注」。這位斯文讀者的留言，解開了一直困擾我的問題，以下內容，保證原文照錄：「兩方面都合理，作者寫的合理，但我有朋友都做緊Year 3 intern，6,000蚊，無端端浪費一年時間，點解唔俾（畀）佢地（哋）一次過讀埋個大學，最後一年畢業再出來搵野（嘢）做，可以搵到9,000蚊？無端端老左（咗）一年又搵少左（咗）錢，似乎又真係無為大學生着想喎~~話就話賺工作經驗，但如果全香港的大學生劃一畢業出來都係有做一年intern，或者全無工作經驗，咁咪即係無比較無高低，出來咪一樣，有咩（乜）所謂有無經驗~~再加上~~既然作者寫到d企業咁難為咁唔願意，大學生又覺得俾人搵笨，咁呢個政策係咪多餘左（咗）D呢？」
勞師動眾成啖心機學生不領情僱主唔高興，學生事務處仝人夾在中間吃力不討好「搵嚟搞」，這個政策可說是「通輸」！我一直無法理解學生何會認定做intern等同被搵笨，原來是錢作怪！難怪當日科大阿仔Chester決定休學一年入中電做intern的決定，因為畢業之後入中電做trainee起薪點是萬八，做intern人工只得一半，身邊同學「有冇搞錯、咁憨居蝕底」之聲此起彼落，為此他承受很大壓力。
實在是太短視又一廂情願了，這一年實戰經驗有幾寶貴學生們居然不知，只識向錢看而不懂珍惜及利用太過可惜！每年有幾多畢業生爭崩頭想入中電？想入談何容易？申請這份工作需要甚麼條件？阿仔有一年實習經驗肯定有着數，除了知道中電的業務範疇管理文化，吸收經驗增強競爭力，更重要的是可以認清自己志趣強弱點所在，一舉多得，何搵笨之有？
張慧敏
http://www.facebook.com/HKcareerdoctor