啱啱過咗嘅周末，孫柏文返咗鄉下探親。有次全家活動，我坐喺鄉下堂弟架寶馬M3時塞車。我又咁啱撞正急尿，所以，我就用古天樂輪胎能級嘅普通話問堂弟：「洗手間，有多遠？」聽完佢話：「沒多遠，就快到。」
就喺佢答嗰刻，我哋見到有位仁兄，喺我哋車傍邊嘅行人路，背向我哋，向牆小解，佢仲要好似國畫大師般，畫畫，最正嘅地方，係有兩個妙齡少女，好似完全冇事咁喺佢後面正常傾計行過。作為愛港愛國嘅香港同胞，我就想學譚耀宗話咁「入鄉隨族」，所以就問堂弟：「我可以跟他一樣嗎？」堂弟一聽，就話：「這，真的不文明啊！你等多一會兒就到了。」
我見冇得屙，就話：「我想用手機拍下，然後放上網，走在新聞最前線。」佢答：「在香港可能是新聞！不過在這裏不是，你上微博，這些照片多得呢。幾個老外一起的也有。」
不過我再諗，就算拍到都要等返香港先放到上我用開嘅網站，因為facebook同Google嘅YouTube，都係俾中央封咗。呢幾日喺祖國上網，我發現好多喺facebook同YouTube最政治不正確嘅嘢，其實一個有決心要搵到呢啲內容嘅大陸網民一定搵到，要組織反革命都唔使用佢哋。咁點解仲要block？
如何令大陸官員幫你
大家可能會話：「佢哋驚自由嘅聲音！」當然，開放市場喺大陸官員裏一向有一定支持，不過冇嘢實際過有錢落袋，要官員幫你做嘢。咁點樣做呢？
年幾之前，騰訊（700）有一批唔知點解行使價好低嘅認股權證。喺邊個手裡、佢點樣攞到，通通令人𢱑頭。不過如果未來有機會做網股股價顧問，就會叫公司發一批行使價好低嘅認股權證，之後高調行出來話不願置評，再喺市場放風話係畀晒有關官員嘅姨媽姑姐行使。我哋香港人最鍾意炒特權股，你隻嘢仲唔升到甩輪胎？
孫柏文
獨立股評人
http://facebook.com/shuen
本欄逢周二刊出