好多電視觀眾成日都話無綫套套劇都係嗰班花旦、小生，加上王維基嘅香港電視遲早殺到嚟，無綫都要搵多啲唔同嘅面孔拍劇，既有新鮮感又可以箍實班藝人唔益王維基，好似曾志偉6月底監製嘅女人劇，開始籌備，女主角就想搵葉玉卿，旁邊嘅卡士都想特別啲，就連堪輿學家麥玲玲都唔放過，想搵佢演出一角。
其實麥玲玲師傅都經常拍邵氏電影，喺《抱抱俏佳人》中仲做過林峯阿媽，不過拍劇就係第一次，問麥玲玲係咪會拍呢個劇，噚日佢笑晒話：「多謝樂小姐（樂易玲）幫我遞咗名上去，要試鏡㗎，唔知合唔合格㗎！」係咪好有興趣試吓拍劇呢？麥玲玲笑得更加開心話：「我見阮小儀之前拍《情人眼裏高一D》都有得同黃宗澤拍咀戲，咁好員工福利，梗係想試吓啦！其實做乜嘢角色都冇所謂，只希望有條愛情線囉。」
抗拒拍姦戲
嘩，無綫咁多靚仔小生，有得揀嘅話，麥玲玲會揀邊個同佢談情、拍咀戲呢？佢笑笑口話：「陳豪、馬國明……就唔好喇，費事俾觀眾鬧啦，同黎耀祥拍啦，我同佢太太熟嘛。」麥玲玲同黎耀祥拍咀戲，都應該會幾搞笑。
平日麥玲玲出鏡都幾性感，唔介意騷事業線，咁拍劇性感得唔得先？會有乜嘢底線呢？佢笑住話：「性感就唔介意，不過強姦戲就唔好喇！」麥玲玲咁搞笑，拍笑戲最適合不過。
版主：陳基征
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/