周小川成為中國史上首位連任三屆嘅人民銀行行長，工作能力不容置疑，可惜就算係林肯都有批評者，何況係周小川？一位央行中人最近就批評周小川「不接地氣」。
「接地氣」係內地2012年十大流行語，用喺政治領域，接地氣就係貼近老百姓嘅實際生活，能夠反映最基層嘅願望，不接地氣嘅意思剛好相反。
內地傳媒近日引述一位央行人士，讚周小川喺國際化同市場化方面，無人能及，但就批評周小川喺把握國情，針對中國特殊經濟運行規律方面有所欠缺，喺貨幣政策上過份引用西方理論，央行內部於是成日話周小川係「不接地氣的人」。
之不過，周小川呢個缺點可能係佢最大嘅優點。國務院參事夏斌承認周小川「有一點兒理想化」，但佢「不腐敗、執着、儒雅、謙恭，也不像當官的」。說到底，中國需要一位受國際社會認可嘅央行行長。