限奶令引發食衞局政務官不滿，只係冰山一角。
梁振英上場後，引入一班梁粉幕僚，人人高薪厚祿，入到政府就得把口，講咗當做咗，更令政務官唔高興。
傳媒老友話，新任特首辦新聞統籌專員鄧惠鈞（June Teng），退休前任職馬會，平時冇乜傳媒人聽過佢電話，莫講話放風吹風，連搞公關飯局都冇。上一任何安達跟出跟入，凡煲呔見記者，佢要在旁打點一切，有特別情況要通水提場。但到𠵱家呢位公關大姐登場，鏡頭前好少見佢在振英身邊，上京面聖都唔多覺眼佢有跟隨。
據聞呢位猛人上任前已表明唔會跟老闆出訪，如果屬實就真係爽，成20幾萬一個月，齋吹水唔使落手落腳做。一個AO捱十幾年先升到首長級同級，做生做死，夜晚八、九點冇得放工。一個梁粉空降幕僚，之前既冇政治歷練，又屬退休人士，更無功能可言，仲要指你做嘢，你話嬲唔嬲。
班底弱雞 輿情低落有因
另一個就更爆笑，中策組顧問關永圻，又係臨近退休人士，冇相關工作經驗，只因識得邵善波，兩人乃中學同學，以合約制請佢做顧問，負責撰寫施政報告。結果第一稿出來畀AO笑到面黃，林鄭更加火都嚟，由佢親自操刀重新再寫過，搞到裙拉褲甩，人人冇得放工。而邵善波本來盤算係申請開多一個全職合約顧問位，又成20萬一個月，畀呢位關先生約滿後轉為長工，點知開唔成，要約滿走人，又白白嘥咗百萬人工。
今日政府施政水平低落，絕對同梁粉班底弱雞有關，有着數就攞晒，要出去打仗就無能為力。張曉明話輿情與民情有落差，原因一字咁淺，就係梁粉傳媒工作全線仆直，吹水當返工，識講唔識做，淨靠西環做就死得啦。
政治宣傳工作，與馬會公關是完全兩回事，馬會負責派錢，人人當你神咁拜，政府弱勢，人人插你，先至係考驗真功夫，而幕僚要打硬仗，更不應變成退休人士俱樂部。
添馬男