話咁快又過一季，記得去年底市場幾乎一致認為，首季港股會扶搖直上，結果梗係冇咁輕鬆！2月初高見23944後，港股捱足兩個月，指數股下插，板塊輪流洗倉。本欄貫徹推介強勢股，部份到3月都捱唔住，例如興業太陽能（750）、天津津燃（1265）等，均見斬倉凶險場面，故此炒股最重要是居安思危，沒有股份能長期反地心吸力，買入後必須定下止賺及止蝕位，並嚴格執行。
第二季多以悶局為主，所謂「十個牛皮九個淡」，指數向下機會料達七成。不過只要戰友減低注碼，縮窄戰線，心頭不要太高，密食當三番，相信仍搵到食。
魏力睇市，不時會在facebook分享心水股，各位若有空歡迎加入討論，集思廣益，有利獲取更高回報。金山軟件（3888）貴為「科技至尊三寶」之一，自然要推介一下。近年金山轉型大搞網絡及手機遊戲，佔盈利八成，2011年7月獲騰訊（700）入股近16%，成為策略夥伴，帶動金山業績大爆發。去年純利勁升33%至4.3億人仔，往績PE為15倍，以科網股而言一點也不貴，基礎亦較同業紮實。當今年增長兩成，以18倍預測PE為目標，中線可見10蚊。戰友可待升破7.35元追入，短線先博8蚊，失守7蚊止蝕。
魏力
http://www.facebook.com/2012jason
本欄逢周一、二、四、五刊出