復活節長假期唐牛過咗大海玩兩日，住喺銀河娛樂（027）旗下悅榕莊，間房有近千呎，但一眼睇晒夠寬敞，最浮誇係房內有個逾十呎長嘅恒溫水池，隨時可以享用，唔使同人爭。
話說晚上同友人在關閘附近用膳後，準備搭接駁巴回酒店，車站居然大排長龍，服務員話由於塞車關係，接駁巴士出現誤點，建議大家到另一個站登車，唔少人等咗超過半個鐘，惟有無奈地轉場。當人潮散得七七八八之際，接駁巴士竟接二連三湧至，部份載了小貓三數隻便開走，負責管理車隊嘅抵打pat pat。翌日，唐牛喺金沙中國（1928）旗下威尼斯人打的，雖然人多擠逼兼且橫風橫雨，但酒店派出多個職員維持秩序，指示清晰之餘，更主動堵截疑似打尖嘅強國人，車隊管理質素明顯贏銀娛一條街。
睇番兩間公司業績，銀娛符預期，金沙則有驚喜，前者股價停滯不前，後者則越升越有。有陣時留意下細節位，原來都可以搵到投資機會。
唐牛