摩連奴會唔會回歸英超，點都要等到今季結束之後先知道，不過球迷唔使等咁耐，另一位狂人已經降臨咗英超。新特蘭啱啱炒咗奧尼爾，隔冇耐就宣佈聘請咗迪肯尼奧接任領隊。迪肯尼奧由球員時代到做教練一直都冇改過佢嘅火爆本色，加上又冇英超領軍經驗，仲護緊級嘅黑貓搵佢嚟領軍，仲要同佢簽兩年半合約，認真夠膽。
新特蘭喺上星期六英超主場輸畀曼聯之後，𠵱家只係領先18位嘅維拉1分，領隊奧尼爾亦終於烏紗不保被炒魷。球會好快搵到接任人選，喺星期日宣佈同意大利籍教頭迪肯尼奧簽約兩年半。迪肯尼奧喺球員時代已經出晒名係臭馬一名，最聞名嘅梗係當年佢喺錫周三出手推跌球證艾確克呢單嘢，結果被重罰停賽11場。退役之後到2011年首執教鞭加盟英乙史雲頓，其實隊波喺佢帶領下成績唔錯，今季升上英甲之後更曾經上過榜首。由球員變做領隊，迪肯尼奧亦不改佢火爆性格，不時狠批旗下球員，最誇張一次直頭同自己球員打交。佢喺1月因為不滿球會劈炮走人。
副會長唔順超請辭
要同迪肯尼奧相處相信唔易，據講新特蘭呢次決定令到唔少球迷甚至陣中球員都有不滿，而實際影響亦已經即時出現咗。球會副會長米利班特國會議員已經請辭，原因係迪肯尼奧曾經承認過佢係法西斯主義者，道不同不相為謀。迪肯尼奧一上任就要面對重大挑戰，會喺嚟緊周日作客出戰車路士，從外國博彩賠率顯示，外界都唔多睇好佢可以喺處子戰就旗開得勝。
護級前路艱難，據講迪肯尼奧會即刻進行鐵腕管治，可能會取消球員嘅休假同埋每日加操多一課，不過球隊都接近喺生死存亡關頭，唔落重藥又點走得出降班漩渦。至少曾經喺史雲頓同迪肯尼奧合作過嘅馬特列治，就力撐呢位性情中人：「佢喺史雲頓低潮嘅時候嚟到，好快就成功帶動全隊嘅士氣。佢係一位好好嘅教練，相信新特蘭嘅球員好快會明白佢嘅長處。」