【本報訊】過了晚上，過了早晨，昨日是第五天。雨停了，陽光把柏油路蒸乾，在碼頭留宿的工人陸續醒來，貨櫃碼頭公司的通告交到剛睡醒的工友手上，瞬即被捏成廢紙，廣播車停靠在他們聚集的停車篷旁，嗡嗡嗡放了整個早上，「閣下必須立即停止逗留或佔用場地……」燃起了工人和巿民的怒火。
中午時分，來聲援的巿民陸續抵達，食物糧水不缺，學生請工人分享經歷，平日慣了操控大型機器的工人，彷彿苦水卡在喉嚨太久，拿着麥克風手就發抖，眼淚隨着辛酸故事一併流出，大叫「我好後悔入咗呢行，點解呢個社會咁唔公平」。
語音剛落，連日人聲紛雜的廣場，突然靜了。
工人開始陸續接到判頭的電話，威嚇若今早10時不復工，永不錄用，人們圍成一個個小圈，決定若沒有談判，不會復工：「冇諗過佢會咁不近人情，我哋點可以復工呀，大家都喺晒度㗎。」一位連日留守，聲音沙啞的工人說：「一個鐘加幾毫子，當我乞兒呀？我買旗冇散紙都畀5蚊啦！」
罷工反可吃飽睡夠
在貨櫃碼頭，隨手都是辛酸故事。20出頭的林先生操作正面吊機，入行6年，見過不少事故，「有時冇拆到（貨櫃）啲繩，有機會成幢冧晒落嚟，早半年一年前咪試過有兩、三幢冧咗，好彩揸機嗰個冇事。」
工人平日沒機會坐定定吃飯，罷工時卻諷刺地可以吃個飽、睡個夠。中午過後，工人開始吃巿民送來的飯盒，下午來聲援工友的，不少是跟林先生相仿的年輕人，對碼頭的環境很感興趣，看着升升降降的貨櫃不停拍照，林先生看得淡然：「冇嘢做嗰陣，啲人就會叫你sip櫃，即係將啲櫃排齊佢，好似打機砌積木咁，你話係咪好無聊吖。」
林先生說話時，很多工友經過插嘴：「你停咗手30秒咋，會即刻打嚟問仲乜唔郁呀，有計時系統，5分鐘着燈，7分鐘又着燈，有晒閉路電視睇住你做乜。」這個晚上，催促的燈不會再亮，入夜後，工人在嘈雜的人聲、音樂聲中入睡，繼續等待談判的機會。
碼頭日夜 工人忐忑
