【不容有失】
去年中學文憑試中文科「肥佬」的黃鈞麟痛定思痛，表明不能接受明年再重考，今年務必要成功，為此不惜斬情絲，又刪除WhatsApp，誓要考進大學社會系。
黃鈞麟去年是屯門一間中學的學校考生，應考的六科有五科獲第3或第4級成績，惟獨中文科得第2級，低於升讀大學最低要求第3級，大學夢碎，「見到個2字，真係喊咗出嚟。」
每日到自修室溫習
十多年來出現首次重大失敗，他平復下來後自我檢討，「反省過唔係能力問題，係唔做啫，如果盡晒力去考，應該會得。」他轉到新蒲崗李求恩紀念中學重讀中六，再戰文憑試。這一年來全力谷中文，除專心上堂，也上補習班，「開本簿記低做錯嘅地方，又背多啲唔同語例，增加文化常識。」
近期他每日早上9時就開始在自修室溫習，到晚上關門才回家，免得在家上網分心。他形容今次重考是背水一戰，「舊年11月時刪除咗WhatsApp同其他手機通訊程式，因為覺得好騷擾，怕忍唔住搵吓朋友、忍唔住搵女仔。」
去年轉校後認識一名同級女生，在拍拖兩個月後也斷然分手，為的是要專心應試，「𠵱家（獲得）大學學位係最優先。」他明言今年重考是最後機會，「所以壓力係大過舊年。」今年有10,980名重考生，當中2,141人是學校考生，餘下8,839人是自修考生。
《蘋果》記者