邊個兩分零鐘搵到1,600萬咁幸運？之唔係香港馬會前主席夏佳理囉！佢名下愛駒「紅色禮物」前晚喺杜拜美丹馬場杜拜世界盃中跑第二，贏得200萬美金（近1,600萬港元）！
杜拜世界盃賽馬之夜係全球馬壇盛事，全晚重頭戲係總獎金高達1,000萬美元嘅杜拜世界盃，係全球最高獎金嘅賽事，夏佳理（Ronald）隻「紅色禮物」原本係英國代表馬，之但係當大銀幕介紹呢匹馬時，卻打出香港特區區旗，代表馬主係嚟自香港。結果「紅色禮物」喺法國好手巫斯義胯下後上不及，輸畀美國代表「動物王國」跑第二，之但係獎金都有成1,600萬港元，比好多國際一級賽頭馬獎金仲要高。
杜拜馬會豪包全程使費
杜拜馬會向來闊綽，包晒所有出賽馬運費、騎練同馬主酒店、機票一切費用，換句話講，Ronald一個仙都唔使出，只係出馬，就成功拎走1,600萬港元。
賽後聽Ronald講，「紅色禮物」跑完杜拜世界盃之後，下個目標可能係香港女皇盃、新加坡新航國際盃，或者日本春季天皇賞，三者擇其一，到時睇吓Ronald會揀去邊個國家袋錢！
mailto:[email protected]
