【添煩添亂】《基本法》第45條規定，特首將由一個有廣泛代表性的提名委員會經民主程序提名後普選產生；而中央倡設的預選機制，被不少人認定不符民主程序。基本法委員會委員譚惠珠昨天談及有關爭論時竟說：「如果有啲問題香港解決唔到，咁最終係要釋法」。
中央官員近期頻頻放風，指特首候選人經提名委員會「少數服從多數」後集體提名，也符合「民主程序」，暗示提名委員會將設預選，惹起社會爭議。譚惠珠昨在一電視節目中明言，特區政府會就提名委員會的提名方式進行透徹諮詢，但若遇上如民主程序的爭議，最終或要釋法。
她指出：「冇人會好希望、好開心見到釋法，包括中央在內，但如果有啲問題香港解決唔到，咁最終係要釋法。」節目主持人追問她可否承諾中央不會就此釋法，譚稱無人可作相關保證。她在節目後「補飛」，指現時沒有人計劃以釋法解決問題。
劉慧卿聞言感憤怒
民主黨主席劉慧卿對譚的說法感憤怒：「叫佢睇返聯合國今次份報告，講普選之前嗰段就係講釋法，委員會係高度關注，覺得畀非司法組織去解釋法律、而解釋係有約束力係影響香港法治，亦都影響司法獨立。」劉指現階段提釋法是添煩添亂，斥「呢啲咁嘅廢話係絕對應該收返」。
《蘋果》記者