【躍躍欲試】
水客自創「收奶檔」，絕招一出果然奏效，不少北上修甲、美容、揼骨及購物的港人，即時加入合法「走粉」行列。在珠海同鄉會任職的阿珍，於元朗一間藥房職員介紹下，以每罐130港元買了兩罐美素4號。她指以往從未做過水客，數日前朋友告知羅湖關口有「收奶檔」，遂躍躍欲試。
「我約朋友喺深圳飲茶，順手帶兩罐奶粉幫補水腳，又唔犯法嘅！」阿珍輕鬆過關，甫出羅湖關口即被「收奶檔」以每罐115元人民幣（兌143.75港元）收購其奶粉，兩罐合共賺了27.5港元。
藥房指生意升兩成
上水冠軒西藥房方老闆指，「限奶令」後其奶粉生意反而升兩成，「限奶令係打擊水客，但無礙奶粉北上喎，𠵱家搞到人人都可以做水客。好多師奶北上飲茶、打牌，都順手買兩罐賺番啲水腳」。
《蘋果》記者