成交一沉不起，二手價抗跌力強。雖然間中聽到有劈價例子，都是「面嗰浸」，高位止賺未蝕到入肉。目前樓市環境或明或暗，不明朗化多咗，但因加咗息依然不過3厘，以前上咗會的業主又唔等錢使，無必要自己斬倉。
合奏唱跌博增成交
尤其是上了車的市民而言，未買到時就擔心買唔起，買咗後都係自用，預留筆裝修費頂多用少啲當慳家，留番點錢傍身，上車難時落車難，若個市回順番都不會賣，叠埋心水收樓享受下。
班地產代理依賴成交維生，根本不會理會業主死活，何況近排入市者買入後起碼幾年內不用買賣或換樓，梗係來一次唱跌大合奏希望樓價跌，博做多點生意；等同當日推出BSD和DSD後，只係講成交少樓價橫行，若果唔係咁講唔會有班人趕搭尾班車，所以代理嘅說話信一成都嫌多，唱高唱低最終目的是促成生意。
市民入市要睇自己需要和能力，老樓幾時都講「有能力、有需要，幾時買都得」，因一買樓便是20年的承諾，上車必須量力而為。
無論市淡市旺，得個單位諗都無謂，「賣咗住邊度呀」，正因呢個道理，目前市淡狀況不會維持很久，只要有人忍耐力不夠落價賣樓便會即刻有人承接，大力鋤價還待何時。下月有個大盤開鑼，發展商增優惠谷客，二手價起碼要挫低一成先好入市，把自己風險減至最低。
劉兆昌 資深地產傳媒人
http://www.HKLau.com