這一生也在進取，這分鐘卻掛念誰……
幾叻都好，都不能缺少另一半，哥哥有首舊歌叫做《你是我一半》，歌詞係談情說愛嘅你給我自滿、我給你一生、開心一世做個伴。做伴之外，另一半亦可以變化多端。習總外訪，焦點就在另一半，夫人嘅衣着及風姿令人眼前一亮，據說即刻提升咗國家形象，而國內人民亦覺得夠晒面子。可見另一半唔失禮的話，確實可以為你面上貼金，尤其是要拋頭露面講形象之輩。所以呢，其實球壇中一班WAGs實在唔係話得個睇字。足球呢家嘢，你話鍾意就鍾意啫，之但係對其他普羅大眾嚟講，八卦消息軟性新聞情侶合照快樂生辰，呢啲先係最重要嘅宣傳伎倆，有出名嘅另一半，隨時令你豐衣足食，國家興盛。
不過呢幾日最令我印象難忘的人妻，卻非習總夫人，而係香港甲組隊FC橫濱嘅梁國威嘅太太，皆因呢位甜姐兒（肯定男士同意）響facebook寫咗篇千字文章，題目係：如果妳的男朋友是足球員，內容係話作為足球員嘅另一半，好應該對佢多點體諒和支持，因為球員這個身份，本身就負上咗好多不為人知嘅壓力、疲累、受傷、不擅辭令以及忙碌，所以身邊人好應該付出多一點嘅關心……呢番說話，喺今時今日足球員仍然處於艱難時期的大環境下，份外叫人感到難得。支持有時實在不需要太多理由，有人默默相信你，就是最好的打氣，我很好奇梁國威聽完這番愛的宣言之後，會唔會有更上一層樓嘅表現，你知道嘛，準備踏出舞台抑或走進球場的一刻，心無雜念是很重要的一環，而要心裏安定的話，莫過於就是有心愛的人送上一句加油。
小時候自己偏愛運動型的女孩，一心就係覺得佢哋會更加明白鍾意玩嘅男仔，仲可以玩埋一份㖭，所以呢，球場上的女士總是受到多一份優惠，更加莫講話會同你一齊打winning了，我人生只遇過一位女性朋友鍾意打足球機，佢當然極受男士歡迎，不過同佢打偏向喺娛樂成份較多，講到打真軍，梗係搵番壯男啦，唔知梁太又打唔打機呢？有了你即是打輸了，也在笑。
keyman
now TV主持
mailto:[email protected]