復活節，信徒紀念耶穌復活，非信徒同樣可以宣告重生。在各行各業中，飲食界可謂最難堅持。無噱頭唔得，噱頭過火又死；有時兄弟不和又要分家，一年中不知多少食肆結業。難得有一群勇士宣告復活再戰，大家齊聽宣言！
記者：陳芷慧
攝影：劉永發、蔡家輝、陳永威
為感情宣戰： 分開以後 重新振作
去年八月星級化妝師Felix Ferreira跟易服好友蘭子，合力開設私房菜兼售美容產品的Fortune Cat，猶記得廁所門外張貼着Felix穿着三角褲的大海報，教我畢生難忘。誰能預知二人關係如煙花般，璀璨後即逝。「Felix喺9月1日就走咗喇！留低咗個爛攤子畀我。」蘭子平淡回應，帶點無奈，「我未試過咁徬徨，投資咗200萬開設私房菜，後來無錢交租，唔知點算。」蘭子回想當初，心有不甘。
Fortune Cat二月重開，但在廚房裏舞刀的，由愛美的Felix變成Royal Feast的Anthony So。「Felix呢？發生咗乜事？」記者問。「唔啱咪分開囉……咁我都知佢有其他工作，分身不暇啩！」蘭子回應。「咁你𠵱家同Felix關係點呀？」記者問。「……無聯絡。」蘭子說。「Anthony嗰時即刻打畀我，問我使唔使幫手。我有啲意外，因佢只係我以前酒吧啲客，唔算好熟，所以我無接受佢，只係搵咗幾個青梅竹馬嘅廚師朋友幫手……不過，因為人工唔高，結果都逐個離開，Fortune Cat惟有結業。」說着，眼眶紅了，哽咽：「但我唔會咁易放棄，自己會孭起佢，為啖氣囉，但好儍咁！」
菇菌套餐攻陷味蕾
然而，煙花散落像雨，緊隨在後也許會是更璀璨的一朵。「Anthony再打電話畀我，竟然願意入股幫我完成心願，佢真係我嘅曙光！」蘭子激動地說。頭上出現耶穌光環的Anthony有點不好意思：「其實之前只係啲噱頭唔啱香港，我就貫徹Royal Feast做法，真材實料，走平價Fine Dining。」 Anthony復活節後的第一炮，是推出全素套餐，以菇菌為主角，適合愛健康的美美們。第一道小食頭盤已足見大廚的心思，一盤四味，分別有低溫油浸的意大利番茄、放上青椒醬及青椒碎的鵪鶉蛋、紫芯番薯茸配紅椒及菠菜葉包着澳洲白菌，集合四種不同味道口感，值得一讚。全晚高潮位絕對是王牌黑松露野菌湯，絕無忌廉和奶，以白菌、雞髀菇、鮮及乾冬菇等廿多種菇菌煲兩日而成。「唔好以為雞髀菇無味，佢就係令全煲湯變得Creamy的關鍵。」 Anthony解釋。還想延續松露香？來一道白松露蒸蛋，底部是加入松露油、松露片的日式蒸蛋，再放上松露醬，無論口感味道都被松露香所攻陷。
「𠵱家生意唔錯，相信會好落去。」蘭子笑言。現在，蘭子終於能靜下來，「之前我掛住搞私房菜，連我最愛嘅美容生意都丟低咗，𠵱家我會繼續再搞。」他經歷了一遍花開花落，說：「信錯人啦！」雖然間中Anthony及蘭子都會因誤會而吵架，但他說：「總之我哋唔會散！」大家拭目以待。
Fortune Cat（2620 6344）
地址：尖沙嘴柯士甸道114-116號山林地舖
＊八道私房菜$480/位
為亡父宣戰： 被弟出賣 另起爐灶
一個車仔麵檔，從木頭車、大牌檔到店舖，華記兩老花數十年用心滾起來。
三年前，小兒子子嵐結束自己的生意，回老店幫手，還找來飲食雜誌做專訪，全家人興奮不已，都說弟弟做事積極。雜誌寫上：「全家人，就只有周子嵐一個堅持要保留老店。」、「生意差，兄長不合作。」只是，兩老想不到區區一個麵檔，用辛勞滾起，卻滾瀉了兄弟情。
家父過世，兄弟反目，弟弟霸佔老店，兄長被迫搬到葵芳，招牌上除了華記車仔麵，還寫上始於1973年。「十多年前辭掉機場工作接手老店，就是知道兩老想退休，又不捨華記。」兄長說。「報道一出，透不過氣來，他更變本加厲，把我煮好的牛腩倒去。」他無奈地說。
孰真孰假？
「想不到最難過的是一群老街坊，他們看着我的成長和努力。」兄長顧着媽媽的感受，沒張揚，只憑勇氣來復活宣戰。兄長說：「街坊找了許久，才知我搬來葵芳。初時單靠車仔麵又不能吸引新客，我便把車仔麵元素加入早餐中。」一個早餐，可加配自家回鍋肉、麻香辣雞丁、沙嗲牛肉、擔擔肉醬、酸辣菜、榨菜肉絲這六款自家製配料。最欣賞他的酸辣菜，有醋酸和檸檬清香，又有爽腍兩種口感。當然，車仔麵還得要真材實料，煮法細膩才行。豬腸做得最出色，毫無異味，只有膏香。「清洗過程超過40分鐘。我阿媽用橙皮辟味，我就用洋葱，更省時。」周生坦言，剛好復活一年，生意漸上軌道，算是成功。「我不知道弟弟現在怎樣。」假的真不了，真的假不了。只是苦了家中兩老。
華記車仔麵（2610 1662）
地址：葵芳高芳街23號地舖
為口碑宣戰： 米芝蓮廚救亡
兩年前由飲食界紅人Alan Yau開設的Bettys Kitschen，被工程公司控告拖欠款項，加上食評不佳，去年易名為St Betty。法國大廚遠走，換來英籍澳裔的米芝蓮二星廚Shane Osborn。Shane喜歡香港，認為人情味濃厚外，本地食材讓他靈感滿瀉。「這半年來我經常逛街市、有機農場、大牌檔，非常有趣。粥店裏的皮蛋，我變成啫喱加入菜式中。」 Shane用料講究，而且煮法細膩。例如雞蛋必用Taiyouran雞蛋，蛋香比意大利蛋更濃。「只要輕輕一煎，即誘發出蛋黃濃香。」蛋加入黑松露卡邦尼意粉中成為香濃的關鍵。至於其他材料，如選用耶路撒冷雅枝竹，比意大利種更甜，大廚還在農場嘗試種植，希望將新品種引入香港。想不到新人上場，即挽回人氣，三點三座無虛席，就連美國駐香港副領事包貴和都是St Betty常客。
St Betty（2979 2100）
地址：中環國際金融中心商場2期2樓2075號舖