「受過傷先知要堅強」！熱火上周三作客輸畀公牛，27連勝告終，好似上周五就搵到出氣袋，作客大炒西岸下游嘅黃蜂108:89，提早落實東岸1哥位置；勒邦占士繼續強勢，個人獨取36分，難怪球隊總裁萊利，不惜公然爆晒粗力撐呢位大帝。
總裁萊利爆粗護大帝
呢場波嘅過程就冇咩好講，熱火第1節已經領先10分，全場大勝19分，大帝拎36分之餘，仲加添6助攻4籃板；帶傷上陣嘅獲迪，就住就住咁攞17分。熱火贏波之後，以57勝15負，比次席嘅紐約人多贏12場，提前10場攞到常規賽東岸冠軍。
熱火周三終於輸波，東岸列強當然唔放過抽水嘅機會，塞爾特人總經理安治就喺波士頓電台寸大帝唔應該就T吉遜嘅犯規投訴，仲撐球證冇畀暴力犯規係啱。身兼熱火總裁及總經理嘅萊利，就立即爆粗回應：「安治收X口啦（shut the f**k up），佢管佢嘅球隊就夠。」萊利80年代領湖人時，安治仲打緊塞爾特人，雙方不時喺總決賽碰頭，萊利就寸安治球員時期只係一隻「軟腳蟹」。
兩個人加埋超過120歲，兩隊職球員不但冇勸交，仲食住花生等睇好戲。大帝就話：「我的天，太勁了！」熱火教練史普利斯查講：「總經理同總經理之間對話一向好精采！」綠軍教練李華斯講：「好有趣，好cool，佢哋應該用拳頭對話。」
鄧肯近期返老還童
不過要兩老打交就應該打唔成，亦都唔慌好睇；要睇梗係睇聯盟1哥爭奪戰。西岸榜首馬刺喺上周五同樣贏波，主場面對西岸勁敵快艇，最後2.2秒仲輸緊1分嗰陣，36歲嘅鄧肯就好似後生10年咁，fake起快艇後衞W格連後射入中距離，仲博埋and one，鄧肯冷靜射入埋罰球，全場攻入34分，協助馬刺以104:102險勝快艇。睇番𠵱家嘅形勢，馬刺只落後熱火兩場勝仗，周日東、西岸1哥大戰，馬刺仲有主場之利，贏波更加可以拉近兩軍差距，兩軍都會搏到盡。
