【灣仔克街】鑽石王老五郭富城啱啱開完演唱會，辛苦咗一排梗係要唞番吓，佢前晚撇甩女友熊黛林（Lynn），約咗好兄弟張智霖同幾個密宗喇嘛喺灣仔嘆印度菜密斟。城城早前開騷期間，爆出真命女友Lynn同疑似小三苟芸慧因搶城隔空罵戰，苟芸慧形容同城城嘅緋聞係爛桃花，辣㷫大婆Lynn出言護城，事後城城幽默代解圍爛桃花為藍桃花，Lynn又喺演唱會度同城城嚟個世紀握手，宣示大婆主權。
張智霖同行
城城懶理Lynn同苟芸慧嘅是非，前晚9點幾約咗張智霖喺灣仔克街嘅皇轎印度餐廳食飯，兩男加幾位密宗喇嘛，同行仲有幾個男女友人。愛揸靚車嘅城城呢晚都開咗佢部灰色林寶堅尼出巡，仲泊正餐廳門口，食完飯撞正落大雨，城城部兩座位跑車，結果只可載一名友人，張智霖就獨自離開，餐廳工作人員就遮兩名女子同兩名喇嘛去搭的士。
採訪、攝影：吳耀輝、陳辰
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/