在電影《同謀》中張家輝與郭富城首度合作，原以為二人會有很多同場及擦出火花，可是電影中二人卻有點各有各做的感覺，家輝解釋：「其實戲入面有段時間我哋分開查，但其實做嘅嘢係互相影響，都係另一種推進劇情嘅方式。」
問到當日張家輝為何會答應演出？他表示：「今次係導演彭順搵我，我咁有興趣參演呢套電影，係因為我近年角色好沉重，今次可以輕鬆少少，二來又未同阿順合作過，三來係我都有追開呢個系列，都想知道加咗自己入去之後會形成一個乜嘢局面，算係畀自己一個挑戰。」
假髮最出位
近年家輝演出的角色多是陰沉及糾結，今次卻有點反璞歸真，他飾演馬來西亞的私家偵探，演出帶點喜感，當中更隱透以往其經典角色、王晶筆下「化骨龍」的味道：「今次演繹方法係輕鬆啲，同埋有番以前我演出喜劇角色嘅味道，呢個係無可避免，因為無論點演嗰個始終都係張家輝嘛！而且我過往演搞笑角色可能太深入民心，我只可以喺小處着手令每一個角色有唔同。」
題外話，一向有說法指現已貴為影帝級的家輝頗介意重提以往化骨龍等搞笑角色，但訪問當日卻並不如是，他坦言不抗拒再拍一套類似的瘋狂笑片，但有一些原則卻必須堅持，他說：「如果你叫我再拍一套無厘頭既搞笑喜劇，我唔抗拒玩吓冇所謂㗎！但如果我係有野心想做好一套喜劇，我一定唔可以重複以往既演出方式，即係搞笑之餘都要有條好實嘅故事線，呢個係我堅持。」
電影中家輝的馬來西亞腔及那頭長長假髮，家輝笑言：「嗰頭假髮直情係出位啦，大熱天時戴住真係幾辛苦，而且喺電影入面又有好多動作打鬥戲，至於個馬拉腔都學咗一陣，但唔可以講太多，唔係怕觀眾聽到煩。」
對於近年合作的多是影帝對手，例如劉青雲、謝霆鋒及今次的郭富城等，家輝說：「其實係咁啱啫，我唔會理對方或自己有啲乜嘢名銜，我覺得係咪影帝都好，一到片場大家都係要盡力、盡心拍好部電影，所以真係冇乜分別。」
撰文：文國駿
場地提供：VIEW62 by Paco Roncero（The East）
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/