【隔牆對論】
今年初，水貨客、內地人幾乎搶光香港貨架上的奶粉，港媽的「求一罐奶粉」訴求只欠未寫在揮春上，其後政府極速推出限奶令。一個問題極速解決，新的問題又極速浮現。海關捉錯了米糊客，草擬法例的政務官寫了又改，改了又擦。藥房老闆劉愛國說，一切都是梁振英一心推高民望惹來的禍，指限奶令捉錯用神，要求撤回法例。一手提出限制奶粉出口的新民黨主席葉劉淑儀則堅持政府沒做錯，稱內地食物安全未「日出」，便不談「日落條款」，倉卒只是急市民所急，公務員應排除萬難執法。
記者：姚國雄 陳凱迎
冇日出何來日落
記：《蘋果》記者 葉：立法會議員葉劉淑儀
年初爆發奶粉荒，水貨客把香港奶粉螞蟻搬家式地運回內地。行會成員兼立法會議員葉劉淑儀1月底提出將奶粉列作「儲備商品」限制出口，政府一周後建議，限制多於兩罐奶粉出口，違者可被判罰款兼坐監。限奶令由建議、諮詢、草擬、拍板至執法前後只有一個月。
記：政府這次做法是否過於倉卒？特首是否急於領功？
葉：當時農曆年近，市民好焦慮買唔到奶粉，特首話急市民所急，民生冇小事，當時社會對佢（梁振英）、高永文局長，甚至對立法會、行會成員都好大壓力，大家都係想一次過解決。有啲嘢，如果唔用雷霆萬鈞之力去處理，拖拖拉拉係一事無成，否則一樣會有人話政府一啲嘢都做唔到。我認為，最終我哋解決咗奶粉不足同（上水）車站混亂嘅問題。
限奶令推出後最少12名內地人因攜帶米糊而被控，高永文因此道歉，有人更稱受精神困擾，向海關索償。
記：誰是拉錯人的罪魁禍首？
葉：拉錯人的確好不幸，其實高局長都道咗歉，有人被拉錯當然係唔開心，特別係攞成人奶粉、長者奶粉嘅遊客，食衞局都同意「嬰兒配方」係有改良空間，因為𠵱家規限係供未滿36個月食（奶粉），成人奶粉、長者奶粉，佢只係唔適宜1至12個月，即係13至36個月嘅人都食得，變咗都要被管制，所以就拉錯咗人，呢啲唔怪得海關人員。點樣界定法例中嘅「配方粉」，要靠食物及衞生局嘅專家，可能佢哋都睇漏眼，唔醒起有成年奶粉、長者奶粉、米糊。呢啲（錯）係人之常情，可以理解，亦都唔怪前線人員，因為佢哋工作壓力大。
自由黨田北俊反對修例，認為此舉破壞自由貿易，前高官王永平也指限奶令破壞香港自由貿易精神。基本法研究中心主席胡漢清也指，限奶令違反《基本法》保障自由貿易的條文。有意見希望限奶令設日落條款。
記：限奶是否破壞自由貿易？是否需設日落條款？
葉：我覺得冇影響，就算澳洲都限制買奶粉，英國有藥房都自動唔賣畀遊客，因為自己唔夠用。自由貿易唔係絕對自由，例如紡織品，第一個管制紡織品出口係英國。香港《進出口條例》有咗幾十年，有多類產品係受到管制，受管制唔係唔畀你出口，不過要攞進出口證，確保係正當貿易。有啲人要日落條款，我同意陶傑所講，問題根源係內地人對內地奶粉冇信心，我都唔知幾時日出，唔知佢哋幾時解決信心問題，我點可以決定幾時日落呢？如果一年後撤回限奶令，水貨客又大規模運奶粉上內地囉！𠵱家好難決定幾時日落。
內地官員和民眾也對香港實施限奶令反感，連飲「港奶」的港澳辦主任王光亞孫女也受到影響，內地人抱怨香港經濟、零售、酒店靠內地自由行撐起，如今卻恩將仇報。
記：香港是否要顧及內地人的不滿情緒？
葉：呢啲不快情緒可以理解，但希望可互相包容，內地幫我哋好多，但香港對內地經濟發展都有貢獻。政府有責任先保障自己市民嘅需要。針拮到就痛，內地人有不快係可以理解，但希望佢哋體諒我哋。
梁振英要求海關「吸取事件經驗教訓，避免出現錯誤」，近日更有傳食衞局常任秘書長黎陳芷娟「劈炮」。
記：公務員是否因梁振英爭取民望成了風波磨心？如何看梁振英與公務員合作？
葉：我相信特首唔係有意將責任推喺公務員身上。公務員、尤其係紀律部隊成日都要從事難度高、被市民指摘嘅工作。政府做咗決定，公務員有責任排除萬難去做，海關同事係明白，佢哋表現好好。我諗公務員唔會因為咁樣怪責CY。
mailto:[email protected]