【想你十年之成就經典】一代巨星張國榮(哥哥)後日逝世十周年,為咗紀念哥哥,哥迷們將全日悼念偶像,而延至今日喺銅鑼灣時代廣場開幕嘅「繼續寵愛.十年.紀念展」,噚日成班哥迷繼續努力摺紙鶴,誓要確保能夠順利列入健力士世界紀錄大全,而現場所見有近百哥迷,展出地方亦已整理得七七八八,而哥哥嘅巨型雕像就仍以紅布遮掩。
阿梅哥哥惺惺相惜
而早年喺陳自強介紹下認識哥哥嘅關錦鵬日前接受梁泰來主持嘅商台節目《1圈圈》節目訪問,關錦鵬話最初認識哥哥時覺得佢好驕傲,但識耐咗就知道係自信,佢話當年哥哥參加歌唱比賽時掟帽落台點知被觀眾嫌棄,呢件事令哥哥有好大轉變,亦都推動哥哥繼續向上爬。
關錦鵬話原本《胭脂扣》唔係哥哥做,佢想搵鄭少秋做十二少,鍾楚紅做楚娟,因為秋官冇期,亦都有諗過搵吳啟華,關錦鵬話:「後來梅艷芳提議話『我叫Leslie嚟做,我係嘉禾演員,去搵張國榮拍呢套戲,之後我再幫新藝城拍番一套。』記得之後梅艷芳真係有幫新藝城拍一套戲,而哥哥同阿梅咁有默契,係有種識英雄重英雄。」而4月1日《1圈圈》更會播出林憶蓮、譚詠麟、陳潔靈同莫文蔚細說哥哥嘅訪問。
此外,商台亦會係明、後兩日喺網頁播出兩場從未曝光嘅音樂會,等粉絲向哥哥致敬,當中包括00年「903 id club拉闊音樂會張國榮」及03年「繼續張國榮音樂會」。而張國榮嘅私人健身教練陳旭達日前接受訪問,佢大讚哥哥勤力、有愛心同埋喺佢身上學會包容及追求完美,佢話平日哥哥運動時,唐唐唔會喺身邊,兩人亦唔會同時間出現健身房。
撰文:馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/