全美大學男子籃球錦標賽（NCAA）16強大戰喺噚日開波，即刻爆出大冷門，東區1號種籽印第安納以50:61輸畀雪城，提早「畢業」。美國總統奧巴馬同「魔術手」莊遜都睇好印第安納，覺得佢哋最有冠軍相，結果齊齊做「燈」。印第安納投射命中率只有33%，今季平均得分達16.7分嘅7呎高主力C薛拿被凍結，得10分進賬，半場已經落後12分。相反，雪城後衞卡達威廉斯入咗全場最高24分；球隊8強將會對3號種籽馬凱特。效力NBA紐約人嘅安東尼曾領雪城贏冠軍，賽後即時好得戚喺twitter向熱火嘅獲迪「挑機」，話下場就會踢佢母校馬凱特出局，有霸氣！