兩支爭逐NBA西岸尾班車資格嘅球隊湖人同小馬，周四都輸波收場；場內表現差勁，就只好用口水戰嚟轉移視線。湖人作客不敵公鹿，球隊賽後大爆後衞拜恩有骨刺問題，結果俾同日遭溜馬大炒嘅小馬前鋒「德國槍」奴域斯基抽水。
「我都有20條骨刺」
講真拜恩嘅勤力程度，球迷真係唔使懷疑，世界和平因為膝傷長唞，佢老哥要頂埋上去打小前鋒，周四作客公鹿上陣36分鐘，結果幫湖人攻入30分之餘，仲有3次助攻同兩個籃板球，但結果都係輸103:113，雖然仲保住第8位，但已經被爵士同小馬追得好近。賽後拜恩罕有地冇接受訪問就離場，有傳媒就報道佢要靠枴杖離場，球隊亦宣佈發現拜恩左足出現一條骨刺。
講真湖人今季幾位主力都受不同程度嘅傷患困擾，嚟到爭季後賽最後階段，如果再有拜恩因傷缺陣，要保前8真係唔易；同樣競爭前8嘅小馬，當然乘機落井下石，小馬前鋒奴域斯基賽前收到達拉斯記者傳來拜恩生骨刺嘅消息，就抽水咁講：「我都有20條骨刺啦！」「德國槍」有冇咁多骨刺就好難講，但周四主場對溜馬之戰嘅表現就普普通通，全場貢獻21分，但其他隊友仲衰，射手OJ美奧只得7分，正選嘅米克占士更食蛋，小馬最終以78:103大敗。奴域斯基早前曾經同OJ美奧、卡達等許諾，球隊上番5成勝率先剃鬚，今場賽前更請定理髮師，諗住贏波之後就可以剃鬚，當然理髮師無用武之地，小馬亦爭兩場勝仗先上番5成。
下周二演生死戰
講開湖人同小馬嘅結怨，兩年前小馬季後賽掃走湖人，激到湖人中鋒拜林同前鋒奧當輸波打人，小馬班主古賓今季初又寸湖人，講如果自己係湖人班主，就會裁走拜恩；加埋呢單骨刺事件，4月2日（下周二）湖人主場對小馬嘅「老8爭奪戰」，就更添火藥味！
