跟郭富城、張家輝在灣仔合和中心62樓餐廳做訪問，兜轉間由地面轉了三趟自動天梯，人蠢，用了差不多10分鐘才到達。
兜兜轉轉是電影圈的定律，時間不代表成功，往後可以依然一無所有。
郭富城兜轉演過《倫文敘老點柳先開》，至05年才成為影帝，歸結來自開竅。根據俄國戲劇大師史坦尼斯拉夫斯基提倡的「方法演技」，電影角色與偶像的關係，多少應該處於對立。因為形象是藝人的成本，放下需要勇氣。
同樣放低的張家輝，由王晶筆下的化骨龍，到電影《証人》獲獎稱帝，今日又可以在新作《同謀》重現市井氣。
影帝同台鬥的不單是演技，還有各自演繹的奇謀。
撰文：何永寧
早前為彭順導演的新作《同謀》，跟戲中兩位主角郭富城與張家輝做訪問。根據史坦尼斯拉夫斯基的方法演技，要求演員完全融入角色，簡單來講監犯要像監犯，斷沒有一個犯人會在獄中留着飛機頭髮型。郭富城由歌手到電影一直以來，參加演出過的電影不少，能夠令他放下而開竅要從電影《三岔口》開始，他說：「從訓練班出身，自己歷練越嚟越多，亦唔係小朋友，一直都好用心機去演戲，直到《三岔口》先真正開竅，全因為張叔平幫我做形象，令我真係完全放下。」
不修邊幅爛身爛世不化妝上鏡，跟舞台王者形象天壤之別，城城說：「造型令我放低靚仔，造就我嘅心態配合角色。唔畀我化妝令我變成唔係自己，反而令我演起嚟好放鬆。原來放低偶像包袱，人可以咁自然。」之後城城又遇上導演譚家明，令他再度拓闊視野，原來演員可以有很多重層次：「喺《父子》譚家明導演教曉我睇到自己到底處喺乜嘢狀態，係演緊戲吖、做緊自己定代入角色？一個呼吸都可以睇得出。」
最怕刀叉
城城的歌手形象深入民心，但做演員卻要將一切推倒重來，他自言電影就是要觀眾在不同舞台看到區別，就像出席化裝舞會，要有不同的偽裝一樣。今次他在《同謀》中再次演繹《C+偵探》神探角色，在固有角色性格中，城城還加入了不少「偽裝」：「導演彭順話陳探嘅角色，係佢有一日食飯嗰陣發現我好有喜感，再將呢個喜感放大寫成，角色一直都有進步。之前喺《C+》即係中文丙+，係話我係一個好渣嘅偵探，由第二集《B+偵探》到今次應該進步咗可能去到更高級都未定。每次做嘅感覺都唔同，最難係每集都隔一、兩年先再演，要搵番嗰種感覺係一種挑戰。今次套戲加入張家輝呢個識武術嘅對手，希望用動作去豐富情節。」
戲中最危險一場，城城要從三層樓高的高架鐵路跳落食肆，下面的刀叉都要經特別處理，他說：「自己拍戲受過傷，所以特別小心刀叉，會用透明膠紙包住，費事拮傷，跳完仲要一鏡過跑出馬路。」談到明年能否憑此片提名最佳男主角，彌補今年《寒戰》失落提名的遺憾？城城笑說：「獎項對演員都只是一種獎勵，從來都沒諗為攞獎去拍戲，當然演員有時候都要一定鼓勵同肯定。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/