【隔牆對論】
記：《蘋果》記者 劉：藥房老闆劉愛國
水貨客搶購奶粉導致本港出現奶粉荒，臨近農曆年假期時，港府與奶粉商開會，要求確保供應穩定，但情況無改善，最終推出限奶令，藥房生意大受影響。
記：實施限奶令前奶粉常短缺，你認為原因是甚麼？
劉：水貨客固然係一個問題，但最大問題係奶粉商同零售商唔夠溝通，部份零售商將奶粉一箱箱咁賣畀大陸人，奶粉商有貨又唔夠放出嚟，放晒出嚟佢都怕唔夠賣，藥房俾水貨客買晒啲奶粉，奶粉商又唔補貨，結果搞到有香港媽咪買唔到奶粉，咪出問題囉！
記：政府推出限奶令是否對症下藥？此做法是否能確保港人買到奶粉？
劉：其實唔係對症下藥！真真正正係得美贊臣同美素佳兒兩個奶粉牌子有短缺，其他牌子根本冇問題，好似惠氏、雅培嗰啲，𠵱家搞到個個牌子都受影響。限奶令之前原本間間藥房都唔夠貨，𠵱家就多到唔使入貨，淨係奶粉銷售量已經跌咗兩至三成，少咗自由行嚟買嘢，連帶其他藥品都賣少咗一成。每日少10個自由行嚟都幾大影響。
限奶令條文不清出現拉錯人混亂，惹來內地人不滿，藥房聲稱生意受挫，為減損失入貨量減半，倘若限奶令持續至今年底，料有約2,000萬罐奶粉滯銷。
記：除藥房生意減少，限奶令最近亦出現拉錯人問題，整件事上誰要負責最大責任？
劉：最錯係政府，問題係佢（指政府）唔肯聽人講，太過急，冇考慮影響有幾大。推出限奶令前我哋已經提出，香港媽咪可以喺藥房優先買奶粉，佢理都冇理過。𠵱家影響到零售商同奶粉商生意之餘，仲影響到真真正正有BB嗰班內地家長，每次帶兩罐奶粉真係唔夠食。政府咁做可能係為咗令客觀嘅民望上升，但就犧牲咗香港自由港嘅稱譽。
特首梁振英接受電視專訪時則稱，限奶令推出至今，香港家長對奶粉需求已基本解決，香港未來會盡最大努力，滿足內地同胞需要。高永文接受內地報章訪問時，卻指若短期內有明顯改善，不排除立即取消限奶令。有指港府因被內地施壓才急急「褪軚」。
記：今次政府急推限奶令，最擔心帶來甚麼後果？
劉：最驚以後會影響自由貿易，今次限奶粉，下次容乜易係限手袋。今次件事已經令內地人好反感，佢哋會覺得唔公平，長遠佢哋可能連香港都唔嚟。香港政府訂政策應該訂得好啲，要諗埋點樣唔影響經濟。
記：香港訂立政策時是否要考慮內地人的需要或感受？
劉：我冇話贊成同反對，最緊要係香港人有奶粉食，我又有生意做。你𠵱家限制啲人嚟買，先搞出咁多問題。政府今次做得太急太快，冇考慮清楚，亦冇足夠諮詢，條例唔夠清晰，改乜嘢都冇用，應該撤銷成條限奶令。
記：撤銷限奶令後如何確保港孩有足夠奶粉供應？
劉：藥房同奶粉商協議，只要拎住張媽媽會卡，就可以優先用藥房價買到奶粉。
劉愛國曾在立法會會議上，踢爆奶粉商綑綁式銷售，強迫藥房訂購熱門1號至3號幼兒奶粉的同時，須訂購較少人買的4號奶粉，雙方因此鬧得不愉快。
記：藥房和奶粉商現站在同一陣線，是否對抗政府？
劉：有乜嘢辦法唔同佢哋企埋同一陣線！你要確保班香港媽咪嚟藥房買到奶粉，就要奶粉商肯保證有供應，唔係我哋話有就有，一定要佢哋應承合作先得。
mailto:[email protected]