如果有一日，當大家喺地鐵逼到好似沙甸魚咁嘅車廂裏，發現有位西裝佬好面善；望真吓，覺得乜咁似一個香港富豪嘅話，你咪以為自己眼花呀，呢位好可能係身家幾百億嘅信置主席黃志祥。有政界中人向八方報料，話唔止一次喺金鐘太古廣場撞到黃志祥，單拖去搭地鐵。首先，堂堂富豪身邊一個陪行保鑣都冇，已經令呢位政界中人嘖嘖稱奇；而黃志祥竟然係去搭地鐵！
據聞有人曾經問過佢去邊？佢話要去尖沙嘴，覺得喺金鐘坐車過海去九龍，可能仲費時失事，不如搭地鐵直接去到仲好，大讚咁樣更加快、靚、正，完全唔覺搭地鐵有失身份。下次大家搭地鐵，不妨望望身邊人，可能左邊係台灣總統馬英九千金馬唯中，右邊就係黃志祥嘞。