今年嘅復活節假期，由今日起連放四日；而下個星期四就係清明，換言之又有一日公眾假期！唔少數口好精嘅香港人，都攞埋復活節同清明之間嘅假，以便放一個悠長嘅假期散心。好多立法會議員亦一樣，心思思放個長假relax吓，尤其下星期冇立法會大會，自然旅行得更安心。
梁家傑遊柏林
好似公民黨黨魁梁家傑咁吖，原來已經同屋企人出發去咗德國咯，佢仲喺facebook上，貼咗喺首都柏林布蘭登堡門前嘅靚相，以及喺街頭食熱狗嘅為食相，搞到八方都好羨慕。另外亦有成18個立法會議員，星期一出發去南韓，不過佢哋唔係去遊埠，而係去考察當地環保措施，星期五至返香港。