【銅鑼灣】都有一排冇見嘅兩位演員趙碩之同陳慧琳細佬陳司翰，前日一齊現身銅鑼灣街頭為電影《冬戀望日》開工。晚上近10點鐘，佢哋兩個企喺希慎廣場門口拍戲，引嚟成班自由行圍觀，可能近年陳司翰集中喺內地發展，所以都有唔少自由行認得佢。
講數爆血案
趙碩之同陳司翰嘅打扮有好大對比，女仔冇化妝加大眼袋，仲着短褲tee同拖鞋，成身街坊look，殘到差啲唔認得佢，反而陳司翰就以踢死兔加煲呔現身。劇情講佢哋飾演反面情侶，趙碩之揸住把刀同陳司翰企街講數，講唔夠一分鐘，趙碩之就一刀插落自己個肚度，跟住成身血瞓街，嚇到陳司翰抱住佢大叫：「唔好影相呀，快啲報警啦！」
雖然事前工作人員已經稍為清潔地下，但始終塊地都好污糟，不過趙碩之諗都冇諗就瞓落去，仲因要拍唔同鏡頭、角度，佢足足瞓地七、八次。到休息嗰陣，趙碩之同陳司翰坐埋一邊有講有笑，姿整嘅陳司翰仲攞住把摺扇，唔知仲以為佢拍古裝。
採訪、攝影：梁繼光、黃曉程
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/