《南華早報》早前做網上民調，問市民支唔支持回歸英國統治，結果逾九成受訪者同意，有人猜測《南早》係咪想藉此洗脫「紅早」之名？食過翻尋味，《南早》噚日再接再厲，問市民同唔同意「佔領中環」？阿爺咁棹忌佔中，《南早》都敢問，食咗豹子膽咩！結果截至噚晚約10,000受訪者中，四分之三市民話同意，唔同意嘅只有四分之一。《南早》向來多白領、專業人士捧場，如果四個白領中，三個會佔中，反映中產白領真係憤怒鳥。
查實唔止呢條問題有膽識，另一條問題仲問市民：認唔認為梁振英推出雙倍印花稅前知會北京，削弱咗本港嘅高度自治？結果逾四分之三人話會，少於四分之一話唔會。