唔少港人愛煲劇，全國人大法律委員會主任委員喬曉陽似乎都係同道中人。點解咁講呢？話說日前南下就政改向港人放風嘅喬老爺喺佢嘅講話中，兩度借相聲劇同電視劇論政改，唔少政界中人笑笑口話，中產鬍鬚曾愛睇法國電影，幹部喬老爺顯然愛煲國產劇，呢啲，咪係佢嘅lifestyle囉！
暗示中港大纜扯唔埋
中聯辦日前發放喬老爺同建制派座談講話全文，有政界中人心水好清，話喬老爺講到若果香港人唔認同喺特定憲法基礎上討論普選問題，任何討論都係「關公戰秦瓊」。
咦！《關公戰秦瓊》咪係內地一套著名相聲劇？關公係三國時代大將，秦瓊係隋末唐初大將，兩個相隔幾百年嘅人，時空完全唔重叠，點會相遇呢？有政界中人話，喬老爺明顯借劇暗示港人同中央𠵱家大纜扯唔埋，希望港人就範。
講到愛國愛港同抗中標準時，喬老爺就引用內地電視劇《宰相劉羅鍋》一句歌詞「老百姓心中有桿秤」，暗示港人自有標準。據知現場有建制派聽完一頭霧水，唔知套戲係乜嘢東東，即時上網搜索，先發現呢套喺96年首播嘅劇喺內地好爆，攞過第十四屆大眾電視金鷹獎最佳長篇連續劇，怪唔得喬老爺對劇集其中一句歌詞記憶猶新。
除咗煲劇，喬老爺都愛煲煙，據知唔少人試過同佢一齊「打邊爐」，話佢每隔一陣就要靠支中華牌提神。當然，佢嘅精神食糧仲有《信報》評論文章，尤其係鬧民主派嗰啲呀；睇香港新聞，據講佢首選被指「反中亂港」嘅香港電台。
mailto:[email protected]