立法會之內，唔只公民黨毛孟靜嘅英文嘞嘞聲，去過外國浸鹹水嘅新民黨主席葉劉淑儀，英文水平都有番咁上下。日前佢應明德學院邀請做嘉賓講師，分享吓學英文嘅心得、以及點樣透過學英文了解世界各地文化，估唔到發生一宗離奇熄燈事件。
見慣大場面冇嚇親
話說當佢講解緊英文裏面，「throw one's hands up」亦可以解作「使人絕望」之時，成個班房嘅燈，突然好鬼應景咁熄晒；眼前漆黑一片，唔絕望就假啦！最終過咗幾秒啲燈先至恢復正常，但見慣大場面嘅葉劉冇嚇親，仲識打圓場話，多謝在座嘅明德學院署理校長李焯芬安排咁別出心裁嘅「special effect」喎。