【熊苟奪王者】黛林（Lynn）與「情敵」苟芸慧除了爭郭富城，昨日更隔岸鬥搵真銀。Lynn穿上V領連身裙谷胸又晒腿，更表示城城的演唱會已完，毋須再拎棒棒玩！另一邊廂，對於城城代解圍爛桃花為藍桃花，肥苟大讚他有幽默感！
熊黛林日前高調撐城城演唱會場，與愛郎世紀握手，為「爛桃花」風波暫畫上句號！難怪昨日她十分風騷，穿上V領連身裙，谷胸以勝利者姿態於尖沙嘴出席新車活動，更在台上表明愛與朋友揸車上山頂及行沙灘。問到會否揸城城的靚車？她即小女人上身：「我一踩engine就埋牆，車技唔得！」提到與城城世紀握手，她即笑不停：「同幾千人一齊握，我係其中一個粉絲仔，自己都驚驚哋，好突然，係禮貌握手，佢知我坐喺邊，過嚟握手係正常。」問到有否收到肥苟道歉？她說：「唔答，緋聞男主角都轉咗，唔使keep住講唔存在嘅話題。」問到會否祝福肥苟與高鈞賢的戀情，她說：「唔知真假，唔可以亂祝福。」她表示演唱會已告終，不用再拿棒玩。
肥苟讚城城幽默
另一邊廂，肥苟仍受緋聞帶挈密密接job，昨日與周柏豪及吳雨霏（Kary）出席澳門威尼斯人活動，記者笑她密密賺可置業，她笑說：「香港啲樓好貴，遲啲先，要多一年時間！我想住港島西，空間大啲。」問到可想與男友同居？她說：「同父母住，做嘢緊要啲。」問到緋聞可有影響男仔埋身？她只說：「工作為重。」對於城城為她解畫「爛桃花」指「藍桃花」，她說：「佢好幽默，答得幾好。」至於向來是地獄廚神的Kary，已向親朋請教廚藝，她笑說：「女仔要識得煮兩味。」
採訪：黃曉妍（澳門）、林嘉慈
攝影：陳俊強（澳門）、陳慧安
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/