和黃（013）大班霍建寧大半年冇公開露面，前日喺長和業績會上露一露，成個人弗咗，兼且後生十年有多，雖然減肥前後嘅震撼程度，唔及財經專欄作家孫柏文，但係都引來財經圈一陣八卦討論。
常飛歐洲吸潮氣
聽霍大班一位朋友講，霍大班確係努力減肥先有𠵱家呢個效果，一頭灰白髮就應該呢兩個月先染黑，年初見佢都仲未染黑咁話。咁一個年薪過億，又啱啱過咗花甲之年嘅男人，無端端做乜咁姿整走去回春呢？
「咪就係有年輕嘅需要囉！」吓，咁即係點呀？佢呢位朋友大賣關子，淨係叫華華咪亂諗嘢，強調霍大班同霍太嘅關係好好，只係霍大班周不時要飛去歐洲，幫和黃睇住啲零售業務，呢類業務比較潮，話唔埋霍大班越見越多潮嘢，終於頂唔順自己個舊look，咪決心換個弗look囉。
聽聞霍大班起碼每隔兩個月就飛一次歐洲，一去就十日八日，次次都係坐私人飛機，想跟蹤佢見識下歐洲有乜潮嘢都幾難。不過咁，大家應該最想知道霍大班點減肥，佢會唔會好似孫柏文咁，食少啲、食慢啲，做吓運動，咁就搣走幾十磅呢？
李華華
mailto:[email protected]
