日圓貶值，專賣日本進口零食嘅阿信屋即時受惠，阿媽CEC國際（759）亦由毫子股變為蚊股。近日走去入貨嘅時候，發現有批包裝卡哇伊嘅洗頭水，但寫住「希臘製」，阿信屋為乜搵貨搵到去呢個曾經瀕臨破產嘅「歐豬」呢？
阿信屋老闆林偉駿聽見話有希臘貨，竟然蒙查查咁答：「係咩？有希臘貨咩？」查探之下佢先話，公司主要向德國、荷蘭、比利時、意大利商家買貨，佢哋嘅工廠遍佈歐洲各地，呢批洗頭水咁啱由希臘工廠製，所以就有批希臘貨。
林偉駿又講，歐洲好多貨品，單睇標價已經平到你唔信，因此，阿信屋𠵱家有兩成貨源來自歐洲，銷路亦唔錯。