立法會正審議限奶令，消息透露政府準備收窄限制出境奶粉範圍，列明七隻奶粉，邊七隻？咪就係日日倒水咁賣洗腦廣告，好似張學友個仔坐氣球滿口英文、幼稚園面試smart ass細路那幾隻配方粉。事實證明，到今日政府先肯間接承認自己搞錯，處事粗疏。
政治考慮壓倒理性
香港奶荒根本不存在，大把冇作洗腦式廣告的美國奶粉牌子，堆滿超市、藥房。正如香港冇米食，問題當然嚴重，但若果係泰國失收，絲苗米供應不足，超市抬價，咁係咪又要立法呢？第二個問題係零售，最近我打開《忽然一周》，見到一個藥房集團廣告，以地圖方式標示出旺角區零售點，六、七條街超過20間藥房屬同一集團，專賣奶粉藥油，做自由行生意，呢類近年湧現之集團式藥房，被指有份參與抬高熱門牌子奶粉價格，人為製造短缺，令本地父母恐慌。
早前見到高永文接受電視訪問，仲好委屈咁話自己一定要維護本地父母利益，做局長做到成個C9咁款，真丟架。以過去AO訓練，冇可能睇唔到奶荒問題本質，𠵱家搞成咁，好明顯係特首及問責局長的政治考慮，壓倒了政務官理性常識，於是成個政策就往錯誤方向走。
見微知著，一件小事，在梁振英、高永文等人政治操作下，做場大龍鳳諗住得分，點知over晒，令光亞叔個孫女都冇香港奶粉食，內地官員唔嬲就假。本來場大龍鳳做得好好睇睇，條法例寫清楚，收窄打擊面，攞個頭彩嚇窒班集團式水貨客就算。但偏偏梁振英認為要嚴打，律政司起草班人跟足指示，有咁闊寫咁闊，製造十幾件冤案，內地就借勢發難，高永文變咗sorry Sir，梁振英要去鳳凰衞視發表安撫內地言論，真係慘情。
香港人本來會同情兩人，一般市民會認為佢哋受靶係為了香港利益，但因梁政治形象差，又搞出BSD、SSD出台前事先知會光亞叔一事，令佢無法借限奶令得分。
幾個回合之後，梁振英的決策粗疏、辦事能力低，在中央面前暴露無遺，今次真係偷雞唔到蝕把米。
添馬男