冇氣、作嘔、腳軟、疲倦……喺高原氣候下，美斯完全發揮唔出水準，單刀都射唔入，令到阿根廷禮拜二作客只能同玻利維亞踢成1:1。不過，喺世盃外南美洲區，阿根廷仍然一枝獨秀，相信出線只係時間問題。
呢場比賽喺海拔3,650米高嘅拉巴斯舉行，空氣含氧量只係得海平面嘅三分之二，所以阿根廷都知難踢。慣咗高原踢波嘅玻利維亞較快入局，25分鐘就靠馬些路摩連奴頭槌建功，領先1:0。仲記得上次作客玻國，阿根廷以1:6恥辱性大敗，但今次阿軍有班尼加追成平手，同埋冇再失波，逼和玻利維亞1:1。
「呢度真係好恐怖」
美斯呢場表現麻麻，成日彎低腰喘氣。佢喺上半場有個黃金機會，前場截到對手傳球，單刀埋門，但佢反應好慢，假腳又呃唔到對手，結果射正對手門將個身彈出。阿根廷傳媒更表示，美斯半場喺更衣室度嘔，令到球隊喺下半場遲咗幾分鐘先入場。賽後訪問，美斯第一句就話「好攰」，之後繼續講：「成個人好𣲷！喺呢個高度比賽實在太恐怖。加速跑幾步後，好難回到氣。」
除咗美斯，其他隊友都頂唔順高原氣候，好似迪馬利亞有次受傷倒地，隊醫即刻要畀氧氣佢吸，連向來硬淨嘅馬斯真蘭奴喺尾段都踢到抽筋。攞到1分後，阿根廷以24分續排南美洲區首位，領先厄瓜多爾4分。阿軍教練沙比拿指球隊今場表現得唔錯，出線形勢大好，「我哋又多1分嘞，但我哋值得拎晒3分㗎。𠵱家晉身決賽周嘅機會越嚟越大，我由中度樂觀變成極之樂觀。」
另外，玻利維亞總統莫拉萊斯係美斯球迷，仲想頒個勳章畀美斯，但當地足總話唔啱規矩，所以告吹咗，搞到佢好冇癮。賽後，莫拉萊斯直接踩入更衣室搵美斯影相；後者啱啱先順番氣，送咗件簽名波衫畀莫拉萊斯，而莫拉萊斯就用件民族服交換，但件衫奇奇怪怪咁。
