國美（493）舊年第四季雖然扭虧為盈，但原來市場對盤數唔多收貨。分析員老友話，國美期內落實咗一啲銷售合約，所以先一次性拉高咗個毛利率，並唔係生意好咗。佢擔心，國美聲稱年初至今銷售已回復增長，只係舊年基數低得出來的數字遊戲，並唔係真正復蘇喎。
國美短線要炒turnaround，睇怕要一段時間持續交返盤正常數出嚟先得，事關公司前幾季的「混賬」已令人信心盡失，唔敢再輕易落疊。海迪更擔心國美長遠的競爭力，因為公司今次講明，以後要係「有盈利前提下發展網購」、「用輕資產模式」，潛台詞即係唔再大力投入爭取市佔率，亦唔再投資自建物流網。如果收縮業務規模，今年要收窄網購的5億人仔虧損，唔難。但𠵱家就決定退出浴血廝殺，咪即係提早舉白旗，讓其他網購商慢慢陰乾國美？據已發展國家的例子，網購競爭最後往往只會有一個羸家獨大，如美國的Amazon。國美似乎已不打算爭奪這個寶座。
提一提各位，私募基金股東貝恩是09年買國美CB，2010年以1.1元左右換股。以私募基金一般fund term約10年計，中段是要減一減磅套現還錢。
呢兩年國美係有搞返好盤數的必要。
海迪