【本報訊】恒大地產（3333）有錢搞波但無錢派息！醉心足球的恒大主席許家印，日前在業績記者會中揚言將繼續投資內地足球。惟集團願意慷股東之慨「燒錢」搞波亦不願派發股息與股東「共富貴」的舉動；再加上集團業績令市場大失所望，即時引來各大券商勁削目標價，而一眾恒大的股東更以行動表示不滿，齊齊沽貨離場。
記者：吳永強
恒大的股價昨一開市已與恒指走勢「分道揚鑣」，更出現洗倉式下跌，最多曾大插超過一成，尾市表現雖略有好轉，惟埋單仍要跌7.45%，收報3.23元。
有內房股分析員表示，「恒大業績係麻麻，但都叫做有錢賺，咁樣反傳統唔派息，冇基金會鍾意，俾人掟貨都在所難免……佢燒錢搞波都唔係乜新鮮事，不過佢成日搞到俾人個感覺有啲不務正業。」
分析：跑輸其他內房股
騰祺基金管理投資管理董事沈慶洪相信恒大的股價難見起色，籲股民「避之則吉」，「噚日股價大插咗後，喺短時間可能會出現番反彈，但相信之後都會喺低位浮沉一段長時間，表現會跑輸其他內房股……要買內房股都買其他穩打穩紮同比較大隻啲。」
面對恒大「唔爭氣」的業績，除了遭股東沽貨宣洩不滿外，各大券商亦紛紛出報告齊齊「踩多腳」。當中以法巴最「唔畀面」，大刀闊斧地將恒大的目標價調低約44.7%，並由原先的4.97元「勁劈」至2.75元；同時亦呼籲投資者「散水」離場，將投資評級亦由持有降至減持。
券商降評級勁削目標價
法巴的報告表示對恒大於2013年及2014年的銷售仍不敢寄予厚望，主要由於集團在三線城市的發展規模過多，並預期集團今年核心盈利會持續「開倒車」。
至於渣打亦對恒大出「重拳」，除將其評級由跑贏大市降至與大市同步，目標價亦由5.3元大削超過兩成至4元，並估計市場將有新一輪針對恒大的降評級潮出現。
另一券商美銀美林雖然亦同樣調低恒大的目標價，惟卻未敢完全「睇死」。該行認為由於集團去年盈利基數較低，料今年要錄得兩成至三成增長並非難事；加上，若集團新公佈的「五年計劃」能夠逐步順利達成，預期未來的投資評級有望向上調整。