政商界名人開餐，通常都揀港島區，近期唔少名流卻頻頻過海去九龍區搵食，有乜嘢吸引到呢班富貴轉移陣地呢？原來一位炮製北京填鴨嘅名廚，去年獲林建岳重金羅致佢去位於圓方嘅「九龍廳」坐鎮，開業後口碑唔錯，好多人一試上癮，一餐仲要擦夠幾隻先過癮！
既然係自己竇口，岳少當然不時喺呢度同老友食飯吹水，北京填鴨係必不可少嘅主打。曾經成為座上客嘅行會成員林健鋒憶述，佢同太太曾經同岳少及佢女友，以及唐唐夫婦等一行12個政商界人士，喺九龍廳食飯；佢話隻北京填鴨食到大家舐舐脷，最終加碼食咗成三隻。
據佢所知，餐廳內主理北京填鴨嘅師傅，嚟自北京「鴨緣烤鴨餐廳」，岳少食過覺得頂呱呱，於是重金撬佢去九龍廳，果然吸引唔少名流過海食鴨。據知佢哋嘅東莞農家菜都係招牌貨，主理嘅師傅由岳少親自出馬禮聘，曾經喺東莞酒店接待過溫家寶及習近平，國宴級數大廚，自然有番咁上下功夫。
九龍廳一隻北京填鴨盛惠598蚊，噚日專程去試食嘅人話算抵食兼好食，事關填鴨會分成皮、背、腿三部份，皮建議點糖，背及腿肉包饃皮後可以點蒜汁或者甜麵醬，食得好鬼骨子。
私人房有後門方便鬆人
呢間名人食店有另一煞食之處，燈、燈、燈、凳，據林健鋒講，就係兩間私人房係有後門㗎，富豪名人可以靜靜雞幫襯，若然開餐時發現門口有狗仔隊，食完可以由後門鬆人，呢個設計，十分貼心。
mailto:[email protected]