「喬」裝普選，辣㷫港人，有信徒在《公教報》刊出題為「向中南海的領導問一句話」的廣告，質問中央是否當香港人「未成年」，無力選出心目中的特首。據了解，天主教香港教區榮休主教陳日君樞機是其中一名聯署「信徒」，他接受訪問時直言很激氣，「爸爸話要揀邊個我哋就揀邊個呀？咩叫反對北京就唔可以選呀？我揀個老婆係我嘅事嚟㗎喎……特首應該我哋揀㗎，冇理由佢哋幫我哋揀㗎嘛。」
署名為「一群天主教的信徒」的教友，在最新一期天主教香港教區刊物《公教報》刊出四分一版廣告，引述《天主教教理》中有關「父母的責任」的段落，提到第2230條，「子女成年後，便擁有為自己選擇職業和生活方式的權利和義務……父母則應該避免，在選擇職業或在物色配偶的事上，強迫自己的子女。」文末更以粗體字寫上「中南海的領導們，請問：香港的子民成年了沒有？」
「覺得普選完全冇希望」
據了解，「一群天主教的信徒」包括陳日君，他接受查詢時坦承有份參與，對全國人大法律委員會主任委員喬曉陽周日明言「不能接受與中央政府對抗的人擔任行政長官」感到極度不滿：「當我哋細路仔咩？好激氣呀，爸爸話要揀邊個我哋就揀邊個呀？我揀個老婆係我嘅事嚟㗎喎，係咪我自己揀就等於我反對父母呀？咩叫反對北京就唔可以選呀？」
他表示，當日得悉喬的言論後，「覺得普選完全冇希望」，「喬老爺句說話咪等於冇真普選囉，冇理由聽佢講一句話就算，我至少問返佢一句囉」。他認為香港人非常成熟，有能力選出合適的人當特首：「香港咁多有頭腦、有讀書嘅人，我哋成熟嘅仔女，有啲選擇係同父母唔同㗎喎。你咁樣逼我哋即係謀殺我哋，叫我哋做奴隸啫。」
他又說，按照十誡中的第四誡，信徒應當孝敬父母，「我冇得罪人㗎，我當佢父母㗎喎……咁我哋一個國家，當佢家庭，咪當佢父母啦吓嘛，咁佢當唔當我哋仔女先？對仔女，我哋係佢承認嘅仔女喎，咁咩叫做反對啫，有啲嘢唔啱我哋都會講㗎嘛，你都要選擇信我哋㗎嘛，特首應該我哋揀㗎，無理由佢哋幫我哋揀㗎嘛。」
對於未來爭普選的行動，他坦言因為教會事務繁忙，所以「好被動」，重申若佔領中環行動有清晰目標，他會參與其中。