銅鑼灣羅素街地舖租金係全球最貴，但唔係所有業主都加租加到盡，好似有「小巴大王」之稱嘅馬亞木，就以市價六折120萬續租個舖畀太子珠寶鐘錶。
只係加到120萬
太子租緊羅素街地下B舖，約1,200呎，喺08年初已經開始承租，月租45萬，今年夠鐘傾續租。
其實由2010年開始，地舖租金就不斷飆升，羅素街一個舖位呎租點都要2,000蚊。但係小巴大王就只係加到120萬就肯同太子簽續租，雖然對比舊租約大幅加咗1.67倍，但都平過市價，打咗個六折。
馬亞木04年尾用1億鬆啲買呢個舖，當年每月45萬租畀The Body Shop，08年竟然一毫子唔加轉租畀太子，唔通馬亞木同佢哋老闆「太子鄧」鄧鉅明好老友？