期指結算日，好友終於爭番啖氣，恒指重上10日線兼回補22500的下跌裂口。不過，大市成交得634億銀，動力仍嫌不足，嚴格來說，港股尚未脫險，入市要繼續審慎。
本欄周二推介的綠城中國（3900），在業績理想、負債急降支持下，表現勢如破竹，昨飆升9.2%，收報14.50元，突破50日線（14.62元）後，將直指今年高位17蚊，要密切留意。
今日繼續介紹績優股，智能手機大賣，相關設備股豬籠入水，盈利今年將踏入第二年高增長，當中主攻手機鏡頭的舜宇光學（2382）可睇高幾班。去年10月，魏力首次薦吸此股，至今狂升一倍，遠勝同期瑞聲（2018）的三成升幅。舜宇仲有幾多水位？保守睇都值12蚊！
手機商今年主攻新興市場，蘋果、三星盛傳以低價機搶客，舜宇主攻500萬及800萬像素鏡頭，完全係食正需求，去年純利大增61%，主要係基數較低所致，今年才是最燦爛的一年；加上汽車鏡頭、智能電視及3D動作控制器等業務逐步開發，勢成日後增長引擎。大摩及瑞信平均預測，舜宇今年純利可增長50%，意味現價預測PE僅13倍，真係平到爛！保守以18倍PE為目標，可見12蚊，現價買仲有近四成水位。
魏力
本欄逢周一、二、四、五刊出
http://www.facebook.com/2012jason