噚日四大電訊商上立法會，向議員痛陳政府建議收回佢哋三分一3G頻譜嘅利害，除咗電訊商，仲有另外14個團體或人士表達意見。會上第一個發言係電盈小股東大聯盟，講明係電盈（008）小股東，佢哋梗係反對政府收回頻譜再拍賣啦。
兩種身份 正反兩極
呢個大聯盟嘅代表人物，就係曾經喺股東會送紅雞蛋畀「小小超」李澤楷嘅陳仲翔（Danny），Danny噚日亦坐喺發言代表席上，點知代表大聯盟發言嘅係副召集人譚玉娟。到民建聯發言時，Danny竟然話歡迎政府收回頻譜。
吓，有冇聽錯呀？唔通Danny沽晒電盈？實情係佢噚日戴上另一頂帽，以民建聯政策副發言人身份發言。咁樣好精神分裂啫！