大家仲記唔記得，「好天買鞋，落雨買鞋，心情好買鞋，心情唔好都買鞋」呢個廣告呢？女人買鞋唔需要理由，打開鞋櫃，閒閒哋十幾廿對，當中可能有一對係幫襯「鞋王」百麗國際（1880），旗下牌子包括Belle、Staccato、Millie’s、Joy & Peace、Mirabell等。
大和料股價未見底
只可惜經濟差，百麗舊年只多賺2.3%，毛利率及經營利潤率雙跌。大和預計，百麗網購表現唔掂，存貨水平又高，可能要減價，仲話睇唔清前景，估計股價會再跌多少少，去到12.50元。
大和踩得咁盡，高盛都忍唔住出手撐一撐，指百麗舊年下半年鞋履經營溢利率雖跌，但仍跑贏同業，加上積極拓展內地三四線城市，為長期增長鋪路，不但符合策略方向，更睇唔到會顯著拖累核心盈利。
又話內地零售市場迅速發展，百麗擁有全方位銷售渠道，包括百貨店、商場、街舖等，定位已較傳統零售店好。一於叫大家繼續買貨，目標價17.90元，距離現價13.04元有近四成上升水位！
其實百麗已承認過去幾年擴張得太快，今年唔會再開咁多店，又盡力挽回信心，指現時同店銷售增長已好過首季。
睇番走勢圖，百麗由上月高位18.59元直插近三成，𠵱家出埋業績，利淡因素已消化，短期再急瀉機會應該唔大。
瑪姬兒