【佔領中環】找的士司機談佔領中環，聽得最多是：「搞乜嘢都好，最緊要唔好阻到搵食。」62歲的吳業培都是搵食為先的升斗市民，在港島區揸夜間的士，每逢7.1，總遇示威者堵路，不同者是他從無破口大罵，「你明白背後意思嘅話，就唔會咁嬲」。「針唔拮到肉唔知痛，以前我乜嘢都唔理，到政府行短加長減，粥水都食唔到，咪慢駛遊行囉」。
記者：呂麗嬋 白琳
的士司機培哥：明白嘅話唔會嬲
中環跟吳業培結下不解緣。11歲已在中環打滾，在全港最大的報刊發行商「張輝記」打工，人生轉了一圈，他又在中環揸的士搵食。跟他談佔領中環，培哥說：「嗰個書生樣嘅教授提出，話要一人一票吖嘛，雖然發夢冇咁早，但呢個世界梗要有人發夢先得。」曾幾何時，培哥都有個夢幻人生：做過發行商搵到第一桶金、開過唱片舖做過老闆，2000年學人炒的士牌遇正沙士一鋪清袋，大起大落。
「我係地獄黑仔王，做咗20幾年發行，搵到啲錢做小生意，鍾意玩音響，咪開唱片舖囉，點知94、95年CD出現，黑膠冇人買，執埋笠。不過最傷嗰次係學人炒的士牌，10幾年前6萬幾首期一架，四架20萬，點知又遇正沙士，冇人敢出街，的士冇人搭，斷供三個月，俾人申請破產，後嚟做咗一陣富豪保鏢，頂唔順成日跟出跟入，咪揸的士囉，起碼自由自在」。
人生兜了一個大圈，他又重新上路，「唔係想成日懷舊，但以前嗰個年代，你肯搏就得，日做兩份工點都儲到錢。我40歲先結婚，老婆肯同我捱，𠵱家個仔先得19歲，仲讀緊書，你唔幫佢畀首期，想買層最平嘅樓？咪使旨意！」每晚開着收音機開工，培哥說聽親新聞都腎上腺急升。
「有人瞓天橋底冇屋住，天水圍嗰幾幢短樁樓空置咗10幾年，家下又話推出畀人買；嗰個鄧忍光，有人示威反對佢，第二日又一班唔知咩人嚟撐佢。我喺香港咁多年，從未見過，你話幾奇？」培哥雖不大了解「乜嘢六部曲、七部曲，萬人商討廣場操作」，但他明白有一班人願意犧牲時間、甚至前途去公民抗命，無非是「唔想特衰政府亂咁嚟」，不是為個人利益，而是為下一代。
每逢大遊行都特別忍耐
所以每逢大遊行，他都特別忍耐，「上年7.1，接咗嗰客，揸到去皇后像廣場，啲人（示威者）跑晒出嚟，塞咗45分鐘，係有啲無奈，但又唔係日日係咁，你明白背後意思嘅話，就唔會咁嬲」。那如果真正佔領中環，你又是否願意付出「可能短時間內無生意做」的代價呢？「咁又真係要諗諗先得，我都唔知，希望好似嗰個咩戴耀廷咁講，唔使去到最後一步，搞得掂就好啦」。