昨文最後一句寫下：「佔領中環，等我。」點知同日竟有本報早前與我所做的訪問一併刊載，內容也就是圍繞一個核心──「中環」。看來有些事情，終究是避不開，逃不了，也何必開定後門仲話要「等」，都足足等咗廿九幾年。立此存照，上面那句改去一字：「佔領中環，有我！」或這會驚動一些人，其中當然包括我司的公關大員。
其實訪問那天，我堅拒有人同行，說實話也就是免得禍及公關同事。照顧我的真身，自是她們責無旁貸的份內事，惟虛擬的「盧生」行事，總不該將一眾也扯下水。對於諸位護駕心意，最終亦只有「千山我獨行，不必相送」以應。講實話，那天獨個兒徒步走到遮打花園，心裏都真係忐忑，也不知到底自己是否已準備好以身試法，所謂「慷慨赴死易，從容就義難」，大抵意思就是這樣。而「佔領中環」由一個倡議、一句口號、一個形式開始，極速發酵蔓延，始料未及。非只港政，連中央要員也忙着明處放聲，暗裏發功，想想可知，是次運動必然是觸動當權者的大條神經，不然怎會如此反應。
反之，以我一貫有前無後的性格，今日都要思前想後，有所保留，可知此事風（應該是「凶」）險。投資界其中一條玉律，或只是口簧就係：「風險越大，回報越高」。而去到我這般年紀，又總算有些少累積、一啲牽掛，都真係犯不着走去搏命，仲要唔知搏乜？起碼身家一定、絕對、100%唔會因此而多咗，咁犯老本嘅嘢，認真不划算。
相信香港值得更好
事實如此，不過其他咪一樣？有番咁上下嘅，驚會少咗個「崩」，又想多一個零，點會「佔領」番自己條財路；冇嘅，又話要等有多番少少，先至再諗其他嘢，「中環」從來只能從對岸仰望；中間唔上唔落，沉默的所謂大多數，疲於供樓、幫個仔爭入名校、報興趣班，無非想個仔有日可以喺「中環」揚名立萬，又豈會倒自己米。既然大家都唔覺得有問題，咁點解有啲人要去搞咁多嘢？我其實唔識答，正如我唔知點分「愛國愛港」？但都仲係分到咁多年我哋喺邊度原地踏步，而我始終相信香港值得更好，亦信人生真係要做的「對」事不多，縱然「錯」做又如何。
最後還得交代一下，「退休或被退休」之後，我也只是一個人親赴中環，當然這亦會視乎盧太是否仍在職，若然佢都辭埋份工，我應該有伴。唔係嘅話，我會畀佢知，到時我應該會靜靜地坐喺蔡東豪隔籬，雖然睇怕嗰陣，都唔會點靜，情況猶如細個讀書，啲同學仔坐埋就自然會掛住傾偈。關於呢點，蔡太亦真係可以放心，將咁重要嘅坐枱責任交畀我。
盧先亞