（怒）上屆南非世界盃有出色表現嘅烏拉圭，周二世界盃外圍賽作客智利10分鐘就失波，隊中前鋒蘇亞雷斯去到35分鐘有次角球機會，頂唔順嘜佢嘅干沙路查拉，死抱住自己唔放，老羞成怒之下突然施以「迷蹤拳」，一拳打埋干沙路查拉塊面度！不過，後者冇即刻瞓喺地下典床典蓆，仲繼續死攬住阿蘇㖭。球證睇唔到，但係重播影到阿蘇出手傷人，現場球迷即時不停爆粗插呢位26歲利物浦球星，而佢亦有可能俾國際足協秋後算賬。烏拉圭最後輸0:2，現時11戰得13分，形勢告急。
球迷盲撐話冇郁手
雖然阿蘇行為可恥，但係就有不少利記球迷喺twitter話偶像冇打人！我求大俠睇到火滾，打得咁應都話冇，支持自己偶像使唔使咁盲目呀？