大家記唔記得，本地主要中文報章對上一次加價，係幾多年之前嘅事呀？八方查過，除咗《信報》喺舊年9月加價兩蚊賣8蚊，絕大部份報紙上次加價已經係2000年、即係13年前嘅事。百物騰貴，紙價同油墨成本都上升唔少，據知本地報紙加價如箭在弦，《蘋果日報》總編輯沙膽虹噚日坦言，有計劃喺4月7日星期日起加價一蚊，即係由𠵱家6蚊加到7蚊。八方聽聞，另一份銷量有番咁上下嘅大報亦會喺同日加價一蚊；至於其他報紙，行內人盛傳《星島日報》同《明報》，都有意喺《蘋果》等加價後跟隨。八方請教行內人，加價對報章銷量有幾大影響，據講有人評估由於加幅溫和，影響未必好顯著。