香港中原城市領先指數上年升咗兩成，已經搞到一班想上車嘅後生仔，幾乎將置業希望變成絕望。不過癲處未算癲，澳門樓價原來仲喪。
當地統計局最近公佈，上年住宅買賣1.6萬幾宗，按年勁減近14%。交投跌，但成交額按年大升26.1%至742.3億澳門元；實用呎價5,736澳門元，聽落平過香港，不過已較2011年勁升38%，其中氹仔更加升近60%。
閣下如果懶醒，相信澳門樓市係由強國人炒起，咁你就錯嘞。一個喺澳門做地產開發嘅高層，噚日同菲菲傾開呢個問題，佢話當地樓市係由澳門人炒起，原因好簡單，就係有錢冇碇使。事關佢哋收入比港人高，普通文員月入都有1.3萬元，想投資？買港股又太麻煩，佢哋又唔好賭，咁除咗買樓，真係冇乜好做。
讀者想轉戰濠江買樓，咁就太遲啦，因為港人去當地買樓花要獻上10%BSD稅；想買二手樓，因為當地人太睇好樓市，所以封晒盤，家陣一盤難求呀。
Fifi
本欄逢周二、四刊出