港股由舊年6月初18000，升到今年2月初24000水平，好多人估恒指會跌番升浪一半去到21000，然後再升；唔少人亦覺得呢一浸係一個升市嘅調整浪，之後一定會再上，呢個位買定內銀、滙控（005）之類死坐，就遲早有錢贏，問題係炒股真係咁簡單？
每逢幾個月嘅升市完結後，晉佳覺得要唞唞氣，睇定啲先決定後市點玩，如果喺所謂調整市中買貨死坐，以為坐定粒六，之後隨時輸到傻。回想2011年上半年，大家都覺得個市仲有一浸爆升，調整後買嘢死坐實冇衰，結果係爆咗個歐債危機，淨係8月初跌頭一大棍，揸重倉一樣勁輸。
恒指高位跌近2,000點，但手揸現金都唔需要心急買嘢，策略上一嚟要少掂熱門股，二嚟少動作，以免chok失信心兼跌錢，比較好嘅策略係限注買強勢又唔跟市走嘅股份，博坐和望贏。
累升唔少料有調整
近排放榜股份當中，唔少條數OK，不過要配合股價有防守性、唔跟市走嘅話，就反而睇隻冷門嘅中國外運（598）。公司主要做貨運船務代理、倉儲等物流相關業務。貨運船務代理方面，中外運係中間人，搞手續、報關、船期之類，利潤率唔高；海運業務係幫客戶進行短距離運送嘅增值服務，仲蝕緊錢。本身業務唔算好有睇頭，利潤率低、冇增長概念、盈利可測性唔算高，好在少蝕錢，市盈率8.6倍，市賬率0.53倍，估值合理。
內地最近公佈2月進出口數據，出口按年增長21.8%，進口下降15.2%，反映內地需求麻麻，至於歐美需求強勁，就帶動中國出口表現。喺咁嘅環境之下，中外運今年業績起碼平平穩穩，如果環球貿易數據持續改善，盈利可以增長，歷史市盈率番去10倍唔困難，即係1.90元左右。
呢幾個月，中外運股價由1元附近起步，去到噚日1.62元升咗唔少，有調整都合理，所以寧願分注吸納，現價首注，然後1.50元、1.40元候低吸。
晉佳
本欄逢周一、三及五刊出